ភ្នំពេញ៖ រដ្ឋបាលខេត្តរតនគិរីកំពុងចងក្រងឯកសារប្លង់រូបភាពតំបន់ទេសចរណ៍ សម្រាប់បង្ហាញទៅវិនិយោគិន ដើម្បីទាក់ទាញនិងសម្រួលដល់ការវិនិយោគវិស័យទេសចរណ៍នៅខេត្តនេះ។
អភិបាលខេត្តរតនគិរីលោក ញ៉ែម សំអឿន លើកឡើងថា ដោយសារខេត្តរតនគិរី គឺជាខេត្តដែលមានគោលដៅទេសចរណ៍ដ៏ទាក់ទាញសម្រាប់ភ្ញៀវទេសចររាប់ពាន់នាក់មកលេងកម្សាន្តជារៀងរាល់ឆ្នាំនោះ រដ្ឋបាលខេត្តបានរៀបចំចងក្រងប្លង់រូបភាពផ្សេងៗ សម្រាប់ទាក់ទាញអ្នកវិនិយោគមកបណ្តាក់ទុនលើវិស័យទេសចរណ៍ ព្រមទាំងវិស័យផ្សេងៗផងដែរ។ លោកបន្ថែមថា ក្នុងការវិនិយោគនៅទីនេះគឺផ្តោតទៅលើវិស័យអេកូទេសចរណ៍។
លោកបន្តថាការចងក្រងនេះ គឺដើម្បីទុកជាឯកសារដល់ក្រុមហ៊ុនដែលមានបំណងចង់បណ្តាក់ទុនវិនិយោគលើវិស័យទេសចរណ៍ មានភាពងាយស្រួលក្នុងការពិនិត្យទីតាំងដែលខ្លួនត្រូវការ។
លោកថា៖ «ការចងក្រងនូវប្លង់តំបន់រមណីយដ្ឋាននេះឡើង គឺពិតជាមានសារសំខាន់ សម្រាប់ការផ្តល់នូវទីតាំងជាក់លាក់ដល់អ្នកដែលចង់វិនិយោគស្គាល់ពីចម្ងាយផ្លូវនៅតំបន់នីមួយៗនោះ ដើម្បីឱ្យពួកគាត់ភាពងាយស្រួលសម្រេចចិត្តជ្រើសរើសទីតាំងមួយដែលខ្លួនចង់បណ្តាក់ទុនវិនិយោគ»។
បើតាមលោក ញ៉ែម សំអឿន រដ្ឋបាលខេត្តកំពុងចងជាប្រព័ន្ធនៃការកសាងប្លង់គ្រប់តំបន់រមណីយដ្ឋានទាំងអស់ ខណៈការចងក្រងនេះបានសម្រេចបានច្រើនគោលដៅមកហើយដែរ។
គួរឱ្យដឹងថា ខេត្តរតនគិរីជាខេត្តមួយនៅភាគឦសានប្រទេសមានរមណីយដ្ឋានទេសចណ៍បែបធម្មជាតិនិងវប្បធម៌ជាច្រើនកន្លែងដែលភ្ញៀវទេសចរភាគច្រើនស្គាល់នោះរួមមាន បឹងយក្សឡោម ទឹកជួរតាតៃ ដែនជម្រកសត្វព្រៃលំផាត់ ឧទ្យានជាតិវីរៈជ័យ ជាពិសេសគឺភូមិវប្បធម៌ជនជាតិដើមភាគតិច៕
